74 street dwellers nasagip sa Pasay

NASAGIP ng mga awtoridad ang 74 street dwellers sa isang rescue operation kamakalawa ng gabi sa Pasay City.

Sinabi ni Pasay City Police chief, Sr. Supt. Joel B. Doria, nagsanib-puwersa ang Metropolitan Manila Development Authority (MMDA), Department of Social Welfare and Development (DSWD) at Women’s and Children’s Protection Desk (WCPD) upang sagipin ang mga palaboy.

Ikinasa ang rescue operation ng mga awtoridad dakong 9:00 pm hanggang 11:00 pm na sinimulan nila sa Pasay Sports Complex, Taft Avenue ng naturang lungsod.

Sa 74 street dwellers na nasagip, 17 sa kanila ay pawang mga menor de edad at walong senior citizens.

Sila ay bibigyan ng pasahe upang makauwi sa kani-kanilang probinsiya.

Ngunit ayon sa hepe ng pulisya, ang problema, makaraan mabigyan ng pasahe ang mga na-rescue ay muling bumabalik upang magpalaboy sa kalsada.