HATAW! D'yaryo ng Bayan hatawtabloid.com
MAS ganadong magtrabaho ang astig na journalist turned filmmaker na si Direk Arlyn de la Cruz sa fourth movie niya titled Pusit. Habang ginagawa niya kasi ang latest indie project niyang ito’y nanalo siya ng award na Best International Film para sa movie niyang Maratabat sa The People’s Film Festival sa New York.
“Ito ang unang award ko, pero sa pangarap ko, marami na akong napanalunang awards,” nakatawang saad ni Direk Arlyn. “Naiyak ako, pero hindi iyong humahagulgol. Yung iyak na parang sira-ulo lang.”
Pang-Best Actress na iyak ba iyan, Direk? “Kombinasyon nina Nora At Vilma yung iyak ko, ganoon, e. Iyong biglang napasigaw, tapos nang umiiyak na, naging Nora bigla,” nakangiting saad pa niya.
Ayon pa kay Direk, tapos niyon ay tinawagan niya agad ang taong nagbigay sa kanya ng daan para makapasok sa pelikula at magawa ang Maratabat. Bilang filmmaker, nagsilbing inspirasyon din daw sa kanya ang naturang award.
Ang Pusit ay isang advocacy film na ang ibig sabihin ay positive sa AIDS or HIV. Ito’y tinatampukan nina Jay Manalo, Ronnie Quizon, Elizabeth Oropesa, Kristoffer King, Rolando Inocencio, Mike Liwag, Tere Gonzales, JM Santos, at iba pa.
Paano niya ide-describe ang kanyang fourth movie, sumasalamin ba ito sa lipunan?
“Ito ay salamin ng ignorance ng lipunan, salamin ng prejudice ng lipunan, salamin ng stigma na kaakibat ng sakit na ito, salamin din ng mga institusyon at ng mga grupo na gumagawa ng lahat ng bagay para matulungan at mabasag ang lahat ng stigma na nakakabit sa sakit na ito,” seryosong saad niya.
Anong aral ang makikita sa pelikula niya? “Mauunawaan dito na ang taong may HIV and AIDS ay katulad mo rin na lumalaban sa buhay. Na you have the same fight, you are fighting the same battle and maybe, harder lamang sa kanila.
“Ang ibig kong sabihin, you don’t have to condemn them. Hindi mo sila dapat pandirihan, dapat mo silang unawain, tanggapin, hayaang mabuhay, at hayaang magkaroon ng pag-asa na tulad nating lahat.”
Ang pelikula ay mula sa Pantomina Films at Blank Pages Production. Ang producer nito ay ang may-ari ng Goodwill Bookstores na si Mrs. Maria Teresa Cancio. Bale balik sa pagiging producer si Mrs Cancio dahil noong 1974 una siyang nagprodyus ng pelikula via Gloria Diaz starrer Sa Ibabaw ng Mundo.
Sinabi ni Mrs. Cancio kung bakit niya naisipang gumawa ulit ng pelikula. “I realized kasi na itong HIV/AIDS is an issue na lalong tumataas iyong cases at pabata nang pabata ang mga tinatamaan nito. When Direk Arlyn approached me, sabi ko, ‘Sige, I will join you’.
“Gusto kong makapag-add ng awareness sa generation natin ngayon not just to be aware but to be concerned sa mga nangyayaring incidence ng HIV where young people tend to be confident with themselves na dahil sa confidence nila, they tend to forget na puwedeng mangyari ito sa kanila.”
ALAM NA! – Nonie V. Nicasio
