Misis ginilitan sa leeg ni mister

NAHAHARAP sa kasong parricide ang isang lalaki makaraan katayin na parang manok ang kanyang 48-anyos misis nang sila ay mag-away dahil sa selos sa Rodriguez, Rizal kamakalawa ng gabi.

Sa ulat ni Supt. Resty Damaso, chief of police ng Rodriguez PNP, kinilala ang biktimang si Susan Luneza, habang agad naaresto ang suspek na si Leo Luneza, 41, kapwa nakatira sa Blk. 6, Lot 49, Alibangbang St., Manila Hills, Brgy. San Jose sa nabanggit na bayan.

Sa imbestigasyon ni PO3 Conrado Cabigao, dakong 7 p.m. nang magtalo ang mag-asawa dahil sa selos na humantong sa suntukan.

Hanggang makadampot ng kutsilyo ang suspek at ginilitan na parang manok ang kanyang misis.

Tumakas ang suspek ngunit agad naaresto  ng mga pulis.

Isinugod sa ospital ng mga kapitbahay ang biktima ngunit idineklarang patay na ng mga doktor.

Sasampahan ang suspek ng kasong parricide sa Rizal Provincial Prosecutor’s Office.