HATAW! D'yaryo ng Bayan hatawtabloid.com
WALANG gustong patunayan na anuman ang pelikulang Tatay Kong Sexy na pinagbibidahan nina Sen. Jinggoy Estrada at Maja Salvador. Napaka-light at nakagagaan ng loob ang pelikula na tamang-tama para sa pamilyang magdiriwang ng father’s day.
Mapapanood na ang Tatay Kong Sexy sa June 1 na ang istorya ay tungkol sa isang single parent na may tatlong anak—sina Empress Schuck, Jolo Revilla, atMaliksi Morales, na nagtaguyod sa tatlong anak simula nang mamatay ang asawa.
Aliw na aliw kami nang mapanood ang preview ng pelikula sa Gateway Cineplex dahil sa mga eksenang talaga namang nakatutuwa. Nariyan ang wagas na pagtataray at walang patumanggang pagtawag ni Maja ng Tatang kay Jinggoy. Kering-keri niya ang pagiging babaeng bakla kaya naman parang nakita namin sa kanya si Maricel Soriano na gumaganap sa mga ganoong role.
Wagas din ang pagtalak at pagtataray nito kay Jinggoy na kering-keri ng aktres.
Natural namang naiarte ni Jinggoy ang pagiging mahigpit na ama sa tatlong anak na kahit sarcastic ay okey pa rin ang dating.
Dumating sa preview ang isa rin na kasama sa pelikula, si Bayani Agbayani. Kaibigang-kaibigan pala ni Jinggoy ang komedyante na naikuwentong madalas mag-Pasko kasama ang senador at pamilya nito. Matagal na rin niyang kaibigan ang senador noong panahong nasa Veterans Hospital pa ang huli.
Ani Bayani, noong isang taon ay doon sila nag-Pasko sa Crame kasama ang kanyang pamilya at pamilya ng senador. Nasabi nga nitong sana raw sa susunod na Pasko’y hindi na roon sila mag-celebrate. Meaning, sana’y makalaya na si Jinggoy.
Narooon din sa preview ang isa rin sa kasama sa pelikula, si Dominic Roque na gumanap na boyfriend na nakabuntis kay Empress. First movie pala ito ni Dominic at masasabi naming okey naman ang arteng ipinakita niya.
Palabas na ang Tatay Kong Sexy sa June 1 at may premiere night ito ngayong gabi (May 31) sa SM Megamall.
SHOWBIZ KONEK – Maricris Valdez Nicasio
