Lito Camo, ‘di maipinta ang mukha sa pagkatalo

ISANG gabi ‘yon ng pansamantalang pagtakas sa kalungkutan bunga ng sinapit ng kaibigang Richard Pinlac. With her assistants Japs Gersin and Tina Roa, napadpad kami ng kaibigang Cristy Fermin sa Cowboy Grill sa Quezon Avenue noong isang linggo.

A sucker for live bands, nagyaya si Cristy mula sa Capitol Medical Center na dinalaw namin ang unconscious pa ring si Richard sa ICU ng nasabing pagamutan.

While seated at nakikinig sa nakapuwestong Jay Brothers, maya-maya’y lumalapit sa aming mesa si Lito Camo na parang nakapambahay lang. Medyo hindi maipinta ang kanyang mukha, hindi pala siya pinalad sa tinakbuhang puwesto bilang mayor ng Bongabong, Oriental Mindoro nitong nagdaang eleksiyon.

Hindi raw maubos-maisip ng sikat na kompositor-mang-aawit kung bakit siya natalo given the fact na suportado pa mandin siya ng kaanak ng kanyang nakatunggali.

“At saka ‘Nay Cristy,” dagdag kuwento pa niya, “ang dami-daming tao roon sa miting de avance ko.”

Isa raw sa mga nagpagaan ng kanyang kalooban ay ang matalik na kaibigang si Manny Pacquiao. “Sabi nga niya sa akin, kung siya nga raw, eh, nakaranas din ng pagkatalo. Dapat lang, eh, marunong kang bumangon.”

Hindi alien si Lito sa larangan ng politika. Bago tumakbong mayor, nagsilbi muna siyang board member ng kanyang lalawigan.

Lalo pang pinagaan ni Cristy ang kalooban ni Lito nang gawin nitong halimbawa si Richard Gomez na makailang beses nang nakipagsapalaran, pero ngayon lang nasungkit ang pagka-mayor sa Ormoc City, ang lugar ng misis na si Congresswoman Lucy Torres-Gomez.

HOT, AW! – Ronnie Carrasco III