Jaclyn Jose, nagbigay ng malaking karangalan sa bansa!

MALAKING boost sa local showbiz world ang natamong Best Actress award ni Jaclyn Jose sa katatapos na 69th Cannes Film Festival sa France. Si Jaclyn ang kauna-unahang Filipino na nanalo ng acting award sa kasaysayan ng Cannes.

Nanalo si Jaclyn para sa kanyang mahusay na pagganap sa pelikulang Ma’ Rosa ni Direk Brillante Mendoza. Hopefully, maging simula ito ng mas magaganda pang balita sa mundo ng showbiz.

Sa video clips nang tanggapin niya ang award, makikitang isinama ni Jaclyn sina Andi Eugenmann at Direk Brillante sa pag-akyat sa stage. “I dunno what to say. I was so surprised. I just went to have a red carpet walk with my daughter, my real-life daughter, and my daughter in the movie also,” saad niya.

Dito’y pinasalamatan din ng aktres ang Cannes at ang Jury na pumili sa kanya para manalong Best Actress.

Kabilang sa mga kinabog ni Jaclyn sa Cannes sina Charlize Theron (The Last Face), Marion Cotillard (From The Land of the Moon), Kristen Stewart (Personal Shopper), Isabelle Huppert (Elle), Elle Fanning (The Neon Demon), at Sonia Braga (Aquarius).

ALAM MO NA! – Nonie V. Nicasio