Guingona Law ipatupad (Danyos sa 75,730 biktima ng martial law madaliin)

HINIMOK kahapon ni Senador Teofisto Guigona III ng Human Rights Victims Claims Board, apurahin ang pagproseso sa kabayaran ng danyos sa libo-libong biktima ng karahasan at pagmamalupit noong panahon ng batas militar.

Itinaon ng senador ang paghimok sa anibersaryo ng Edsa People Power Revolution ngayon kasabay ng kanyang pakikiisa sa pag-alaala sa ipinamalas na pagkakaisa at kagitingan ng mamamayan para makamit ang kalayaan noong 1986.

“Kontribusyon ko para sa mga nagsakripisyo at biktima ng batas militar ang pagtiyak ng buohan at kasiya-siyang pagpapatupad ng Republic Act 10368 na nag-aatas na sila’y kilanlin at pagkalooban ng kabayaran sa danyos na kanilang dinanas noong panahon ng batas militar,” pahayag ni Sen. Guingona.

Ang Guingona Law, o ang Human Rights Victims Reparation and Recognition Act of 2013, isa sa mga ‘markadong’ panukala ng senador na naisabatas, ay pagkilala ng estado sa buhay at sakripisyo ng mga biktima ng paglabag sa mga karapatang pantao  noong panahon ng martial law.

Sa bisa ng nasabing batas, opisyal na pinasimulan ng gobyerno ang pagproseso at pagbayad sa tinawag na reparation claims ng mga biktima o kamag-anak, at ang halagang matatanggap ay tugma sa bigat ng karahasan na kanilang dinanas.

Noong Mayo 30, 2015, may kabuuang 75,730 biktima, o kamag-anak nila, ang nag-file ng reparation claims sa HRVCB, pero mahigit 11,071 lamang ang natapos maproseso at naaprubahan ng board na kuwalipikado sa danyos.

Sinabi ni Guingona, kailangang madaliin ng claims board ang pagsasaayos ng lahat ng mga papeles at dokumento ng mga aplikante para sa danyos bago ang Mayo 12, 2016 na takdang panahon para sa dalawang taon na trabahong itinakda sa ilalim ng RA 10368.

Gayonman, nilinaw ng senador na sakaling hindi matapos ng HRVCB ang kanilang trabaho pagdating ng Mayo 12 ngayon taon, may nakasalang na ang dalawang kapulungan ng Kongreso na aprubadong panukala sa ikatlo at huling pagbasa na maibibigay pa ng karagdagang dalawang taon para palawigin ang gawain ng claims board.

May P10 bilyon ang inaasahang paghahati-hatian ng 75,730 biktima ng batas militar kung sakaling silang lahat ay mapatunayang karapat-dapat sa reparation pay.