Bawas-pasahe ipaubaya sa LTFRB — Palasyo

DUMISTANSYA ang Palasyo sa panukalang bawas-pasahe ng transport groups kasunod nang sunud-sunod na pagbaba ng presyo ng produktong petrolyo sa pandaigdigang pamilihan.

Sinabi ni Communications Secretary Herminio Coloma Jr., ipinauubaya ng Malacanang sa Land Transportation Franchising regulatory Board (LTFRB) ang pagpapasya sa panukalang bawas-pasahe.

Aniya, nasa mandato ng LTFRB na magdesisyon kung kinakailangang magpatupad ng fare adjustment.

Tungkulin aniya ng LTFRB na magtakda ng pamasahe na makatwiran, makatarungan at kapaki-pakinabang para sa mamamayan.

“It is the LTFRB’s mandate to decide a just and reasonable fare for commuters,” aniya.

Magugunitang nagpanukala si Efren de Luna, national president ng Alliance of Concerned Transport Organizations (ACTO), na ibalik sa P7.00 ang minimum na pamasahe sa mga pampasaherong jeep sa unang apat na kilometro.