2 karpintero ni Pacman tigbak sa bangga ng dump truck

GENERAL SANTOS CITY – Binawian ng buhay kamakalawa ng gabi sa pagamutan ang pangalawang biktima sa pagbangga ng traysikad sa isang dumptruck.

Ito’y bunsod nang malaking sugat sa ulo ng biktimang si Sonny Alaba, 34-anyos.

Kung maaalala, nabundol ng dumptruck ang traysikad na sinasakyan ng anim na panday o karpintero ni Sarangani Rep. Manny Pacquiao, nang magkasalubong sa 4 lanes sa Baluan, Sarangani Highway kamakalawa.

Agad binawian sa insidente si Cristopher Amarillo, 51, driver, habang sugatan ang mga kasamang sina Jeje Man-ao, 24; Mon Enel, 20; Johnen Ele, 50; at Trog Pusan, 22, pawang mga residente ng Baybay. Kawas, Alabel Sarangani Province.

Ayon kay Balu-an Kapitan Arman Diamante, makaraang sumalpok ang truck sa traysikad ay binangga at nawasak din nito ang nakaparadang kuliglig ngunit masuwerteng hindi na umabot sa nakahilerang mga balot vendor.

Nalaman na ang nasabing mga biktima ay mga panday ng Filipino ring icon sa pangatlo nitong mansiyon sa Lagao sa Lungsod ng Heneral Santos.

Agad ikinostudiya ng Traffic Management Unit ang driver ng kuliglig na si Romy Sausa at ang dumptruck driver na si Junie Mongkil para maimbestigahan.