Lopez pink castle mansion nasunog, 2 sugatan

ILOILO CITY – Dalawa ang sugatan sa nangyaring sunog sa Lopez Pink Castle Mansion sa Luna, La Paz, Iloilo City kamakalawa ng gabi.

Nangyari ang insidente habang isinasagawa ang sponsored dinner ng pamilya Lopez sa loob ng mansiyon.

Agad nagresponde ang 10 firetrucks at naapula ang apoy bago pa tuluyang matupok ang mansiyon.

Kabilang sa sugatan ang isang bombero at isa sa mga bisita ng pamilya Lopez.

Hindi pa matiyak kung ano ang pinagmulan ng apoy at tumanggi rin magbigay ng pahayag ang isa sa mga naninirahan sa mansiyon na si Nicky Lopez.

Napag-alaman, kabilang sa agaw-atensiyon sa Lungsod ng Iloilo ang nabanggit na mansiyon dahil sa pinta nitong kulay pink.

Ito ay pag-aari ng anak ng yumaong bise presidente na si Fernando Lopez Sr., na si Fernando “Junjie” Lopez Jr., na sumakabilang-buhay na rin.