Kinidnap na mayor ng Naga, Zambo Sibugay pinalaya

PINALAYA na ang dinukot na alkalde ng Naga, Zamboanga Sibugay na si Mayor Gemma Adana, nitong Martes ng umaga.

Ito ang kinompirma ng Joint Task Group Zambasulta ng Armed Forces of the Philippines.

Ayon kay Captain Roy Vincent Trinidad, dinala si Adana sa mismong bahay ni Sulu Governor Abdul Sakur Tan bago mag-alas syete ng umaga kahapon.

Agad sumailalim sa stress debriefing, trauma counseling at medical check up ang dinukot na alkalde.

Inaasahang dadalhin kahapon sa Zamboanga City si Adana para sa naghihintay na pamilya.

Sinasabing pinalaya ang alkalde dahil sa pressure sa military operations laban sa bandidong grupo.

Matatandaang dinukot ng limang armadong lalaki si Adana sa kanyang bahay noong Abril 6.