Babaerong mister sinaksak ni misis

BUNSOD nang matinding galit, sinaksak ng isang ginang ang kanyang mister nang matuklasang may kabit ang lalaki kamakalawa ng gabi sa Tondo, Maynila.

Nilalapatan ng lunas sa Tondo Memorial Medical Center ang biktimang si Conrado Estoria, 47, pantry man ng Tropical Hut restaurant.

Habang nakapiit sa Raxabago Police Station 1 ang suspek na si Ma. Maritess Estoria, 33, kapwa nakatira sa 2745 J. Santos Street, Brgy. 182, Gagalangin, Tondo.

Ayon kay Supt. Redentor Ulsano, hepe ng Raxabago Police Station 1, dakong 11 p.m. nang mangyari ang insidente sa bahay ng mag-asawa.

Napag-alaman, nagtalo ang dalawa nang matuklasan ng suspek na ang biktima ay may babaeng ibinabahay at nagkaroon pa sila ng anak.

Napundi ang biktima sa kadadakdak ng suspek kaya nasampal niya nang malakas.

Nasubsob sa kusina ang ginang at nang makabuwelo dumampot ng kutsilyo at pinagsasaksak ang biktima.

Nakahingi ng saklolo ang kanilang mga anak sa barangay tanod na siyang umaresto sa suspek habang dinala sa ospital ang biktima.