Konsehal patay, mister sugatan sa tandem sa Dapitan

DIPOLOG CITY – Patay ang isang incumbent barangay councilor habang sugatan ang kanyang mister makaraan pagbabarilin ng riding in tandem sa Purok Kawayan, Brgy. Liyang, Dapitan City kamakalawa.

Kinilala ang biktimang si Riza Gablines, 46, konsehal ng Sicayab Bucana Dapitan City, habang ang asawa ay kinilalang si Marlon Gablines, 48-anyos.

Sa imbestigasyon ng pulisya, pauwi na ang mag-asawa galing sa kanilang tindahan lulan ng asul na Mitsubishi pick-up nang mamataan ang dalawang ‘di nakikilalang lalaking sakay ng motorsiklo.

Biglang nag-overtake ang motorsiklo at binaril ang mga biktima.

Tinamaan ang konsehal sa kaliwang balikat malapit sa dibdib.

Sinasabing nakahingi pa ng tulong ang mag-asawa, at dinala sa pagamutan ang mga biktima ngunit hindi na umabot nang buhay ang konsehal.

Patuloy ang imbestigasyon ng mga awtoridad upang mabatid ang motibo sa pamamaril.