Pinoy Pride yayanigin ang Amerika

NASA Los Angeles, California, USA ang Pagara brothers na sina Jason at Prince Albert kasama si Mark “Magnifico” Magsayo para pataasin pa ang antas ng kanilang ensayo bilang preparasyon sa kani-kanilang laban sa Oktubre 17 sa StubHub Center sa Carson, California.

Ang US debut ng tatlong boksingero ay babanderahan ng ALA Promotions.

Diretso ang tatlo kasama ang kanilang head trainer na si Edito “Ala” Villamor sa Wild Card Gym ni Freddie Roach. Nakaalalay sa tatlo ang pinagpipitaganang “strength and conditioning coach” na si Nick Curson.

Nakatakda namang sumama sa kanilang training si WBO light flyweight champion Donnie “Ahas” Nietes sa kalagitnaan ng Setyembre.

Si Jason (36-2, 22 KOs) ay kasalukuyang nakaranggo bilang No. 2 sa WBO, kampeon naman ang wala pang talong si Prince Albert (24-0, 17 KOs) ng IBF, samantalang wala pa ring bahid talo ang karta ni Magsayo (11-0, 9 KOs) na kampeon naman ng IBF Youth featherweight.