Pagara asam ang world title

PAGKARAAN ng impresibong panalo ni Albert Pagara via first round knockout kontra Jesus Rios ng Mexico nitong linggo sa Dubai World Trade Center, lalong tumatag ang pangarap niyang marating ang dulo ng tagumpay—ang masungkit ang world title.

Nang makapanayam ng mga mamamahayag pagkatapos ng malaking panalo ni Pagara, isiniwalat nito na ang susunod nilang target ay ang makalaban sa Amerika.

Ayon sa kanyang promoter na si Michael Aldeguer, nakatakdang lumaban si Albert sa United States sa Oktubre 17 sa StubHub Center.

“Yes, he will be there with (featherweight) Mark Magsayo. It’s time to bring Albert to the United States,” pahayag ni  Aldeguer.

Si Magsayo ay isa pang sumisikat na Pinoy boxer na may impresibong ring record na 11-0 na may 9 na knockouts.

Pagkatapos ng laban ni Pagara kay Rios ay pinagkaguluhan ng fans ang Pinoy pride at nagpahayag ito ng kasiyahan dahil alam niyang napasaya niya ang kanyang fans.

Sa tinuran niyang iyon ay inihahalintulad siya kay Manny Pacquiao ng ilang nakapanood na fans.   Ayon sa kanila, tinitiyak ni Albert na magtatapos sa knockout ang laban para mapunan ang ekspektasyon ng kanyang fans.