Black prop vs Poe ‘di pakana ng Palasyo

ITINANGGI ng Malacañang na sila ang nasa likod ng mga propaganda laban kay Sen. Grace Poe lalo na ang isyu sa kanyang citizenship.

Ayon kay Presidential Spokesman Edwin Lacierda, hindi nila ito magagawa kay Poe dahil inaalok nga nila ang senador na maging running mate ni Liberal Party standard bearer Mar Roxas.

Iginiit niya na hindi sila maninira at wala silang kamay o kinalaman sa nasabing usapin.

Kahapon, nagtangkang magsampa ng reklamo ang isang Rizalito David sa Senate Electoral Tribunal para madiskwalipika si Poe sa pagkasenador dahil hindi sinasabing hindi siya Filipino.

Nauna rito, nagbanta si dating Negros Oriental Congressman Jacinto Paras, dating kaalyado ni FPJ, na magsasampa ng disqualification case laban kay Poe dahil sa isyu ng pagiging “foundling” ng senadora at ayon sa Saligang Batas, dapat natural-born citizen ang mga opisyal ng gobyerno.