Amazing: Gumulong na lagare sumalubong sa kotse, driver nakaligtas

NAKALIGTAS sa tiyak kamatayan ang isang lalaki sa China makaraan salubungin ang minamaneho niyang kotse ng isang higanteng circular saw blade na nahulog mula sa likuran ng isang truck sa Chongqing-Guizhou Expressway, at nahiwa ang kanyang sasakyan.

Sinabi ng lalaking kinilala ng Telegraph bilang si “Mr. Xiang,” nakarinig siya ng lagabog nang ang truck sa opposite lane ay nawala sa kontrol, at nakalas dito ang kargang circular saw blades na 5 feet ang diameter. Isa sa blades ang mabilis na gumulong sa kalsada at sumaluong sa sasakyan ni Xiang.

“I just heard a ‘bang’ and then I saw all the white smoke in front of me,” salaysay ni Xiang sa The Shanghaiist, makaraan ang insidente noong Hunyo 17. “I almost lost control of my car.”

Nahiwa ng nasabing saw blade ang hood ng sasakyan ni Xiang sa lalim na 20 pulgada ngunit napigil ng makina, na halos malapit na sa driver’s seat.

Sinabi ng pulisya sa South China Morning Post, hindi napansin ng driver ng truck ang pagkahulog ng saw blades mula sa kanyang sasakyan na nagdulot ng aksidente.

Masuwerteng hindi nasaktan si Xiang ngunit matinding nabigla sa insidente. (THE HUFFINGTON POST)