Seguridad sa D League finals hihigpitan

 

SINIGURADO ng PBA na magiging mahigpit ang seguridad para sa huling laro sa best-of-three finals ng Foundation Cup mamayang hapon sa Ynares Sports Arena sa Pasig na paglalabanan ng Hapee Toothpaste at Cafe France.

Sinabi ng isang opisyal ng PBA na maraming mga pulis-Pasig ang magbabantay sa loob ng venue para sa inaasahang magiging mahigpitang laro ng Fresh Fighters at Bakers.

Sa Game 2 ng serye noong Lunes ay nagkainitan at nagkatulakan sina Hapee team manager Bernard Yang at Cafe France assistant coach Jun Tiongco sa huling dalawang minuto ng laro.

Pareho silang pinatalsik sa court at nanalo ang Bakers, 76-70, upang maipuwersa ang do-or-die na laro ngayon.

Libre ang pasok ng mga tao sa Ynares para sa larong magsisimula sa alas-tres ng hapon at mapapanood kinagabihan sa IBC 13.

Ito ang unang beses sa kasaysayan ng PBA D League na umabot sa Game 3 ang best-of-three finals mula noong magsimula ang liga noong 2011 bilang kapalit sa nabuwag na Philippine Basketball League.

ni James

Ty III