Castro balik-porma sa TNT

PAGKATAPOS na hindi siya naglaro sa unang tatlong asignatura ng Talk n Text sa PBA Governors’ Cup, nakabalik si Jayson Castro at hindi nawawala ang kanyang dating porma.

Naging bida ang Best Player ng PBA Commissioner’s Cup na si Castro sa 108-89 na panalo ng Tropang Texters kontra NLEX noong Martes sa Cuneta Astrodome kung saan nagtala siya ng 19 puntos, limang rebounds at limang assists.

Matatandaan na pinagpahinga muna ni TNT head coach Jong Uichico si Castro pagkatapos ng finals ng Commissioner’s Cup dahil sa sobrang pagod at mga pilay na nangyari sa huli sa serye kalaban ang Rain or Shine.

Naunang nakabalik si Ranidel de Ocampo sa lineup ng TNT mula sa kanyang pilay noong finals ng second conference kaya nararamdaman ni Castro na unti-unting lumalakas ang Tropang Texters lalo na tumutulong din ang mga imports nilang sina Stephon Pettigrew at Sam Daghles.

“Puwede akong maka-off guard at point guard dahil beteranong point guard si Sam,” ani Castro. “Kaya pagdating ng playoffs ay fresh na fresh kami dahil pantay ang minutes ng first at second group. Maganda ang start namin this conference kaya sana ay makabalik ang championship form namin.”

(James Ty III)