HATAW! D'yaryo ng Bayan hatawtabloid.com
NAKAHABOL ang Golden State Warriors mula sa 16 puntos na kalamangan ng Houston Rockets sa ikalawang quarter upang maiposte ang 110-106 panalo kahapon sa Game 1 ng NBA Western Conference finals na ginanap sa Oracle Arena sa Oakland, California.
Nanguna si NBA MVP Stephen Curry sa kanyang 34 puntos, kabilang ang kanyang dalawang free throw sa mga huling segundo ng laro, upang makuha ng Warriors ang 1-0 na kalamangan sa best-of-seven na serye.
Isang 21-4 na ratsada sa pagtatapos ng ikalawang quarter sa pangunguna ni Curry ang nagbigay sa Warriors ng 58-55 na trangko sa halftime pagkatapos na lumamang ang Rockets, 49-33.
Nakalayo ang Warriors sa 108-97 sa huling quarter bago naghabol ang Rockets sa pangunguna ni James Harden upang tapyasan ang kalamangan sa 108-106 bago ang dalawang free throw ni Curry na nagsiguro sa panalo ng Golden State.
Nagtala si Harden ng 28 puntos, 11 rebounds, siyam na assists at apat na agaw para sa Rockets.
Gagawin ang Game 2 ng serye bukas sa Oakland, California pa rin bago lumipat ang serye sa Houston para sa Game 3 at 4.
Samantala, magsisimula ngayon ang Eastern Conference finals ng NBA na paglalabanan ng Cleveland Cavaliers at Atlanta Hawks.
Gagawin ang Game 1 ng serye ngayong alas-9 ng umaga sa Philips Arena sa Atlanta, Georgia at mapapanood ang laro sa ABS-CBN Channel 2.
(James Ty III)
