Sa Ngalan ng Pag-ibig (Ika-21 Labas)

“Check-out na tayo?” usisa ni Jasmin kay Karlo na maayos na ang mga kasuotan.

“Oo,” tango ng binata sa katipan. “Aalamin ko lang sa ibaba ang dapat na-ting bayaran.”

Sa ibaba ng motel, kinompirma ng receptionist sa mga tauhan ni Jetro na naka-check-in nga roon ang isang mag-boyfriend-mag-girlfriend.

“Baka sila na nga ang hinahanap n’yo,” sabi ng matabang babae na tumatao sa counter.

“Itawag mo kay Bossing Jetro na narito tayo…” utos ng pinakalider ng mga goons sa isang tauhan. “Susunod daw ‘yun dito sa atin.”

“Iba talagang mag-trip ang bossing natin, ‘no?” sabi ng lalaking may hawak sa two-way radio.

“Ewan ko nga ba… Napakarami na-mang chikababes, e mas type pa ‘yung umaayaw sa kanya,” ang naiiling na sabi ng lider ng mga bata-batang goons. “At ang masaklap pa n’yan, matindi rin ang pagsintang pururot ni Andy sa Jasmin na ‘yun, a.”

Iyon ang mga usap-usapang narinig ni Karlo sa punong-hagdanan ng ikalawang palapag ng motel. Kaya naman mabilisan niyang binalikan si Jasmin sa inookupahan nilang silid.

“Magbihis ka, bilis!” aniya.

“Bakit, Karl?”

“Nandiyan sa ibaba ang mga aso ni Jetro…”

Kumahog na nagbihis si Jasmin.

“Sa bintana tayo daraan…” pagbibigay-instruksiyon ni Karlo sa dalaga.

Itinali ni Karlo sa rehas ng bintana ang pinagdugtong na dalawang kurtina ng kuwarto ng motel. Doon niya pinaglambitin ang nobya sa paglapag sa lupa. At gayondin ang kanyang ginawa sa pagtakas doon.

Sumakay sina Karlo at Jasmin sa isang pampasaherong traysikel. Noon namataan ng pangkat ni Jetro ang kanilang pagtakas.

“Hayun sila… Habulin!”

Parang iisang taong nagsikilos ang mga goons. Nagdambahan ang mga ito sa dalawang nakaparadang sasakyan sa tapat ng motel. Agad na pinasibad iyon ng dalawang lalaking nasa harap ng manibela. At paharurot na binuntutan ang traysikel na sinasakyan ng magkasintahan.

“Tigil… Huminto ka!” ang sigaw ng tauhan ni Jetro sa nagmamaneho ng traysikel.

“Bilisan mo, P’re…” utos naman ni Karlo sa tricycle driver. (Itutuloy)

ni Rey Atalia