Asian import kinukonsidera ng SMB

BUKAS si San Miguel Beer head coach Leo Austria sa pagkuha ng Beermen ng import na Asyano para sa PBA Governors’ Cup.

Inamin ni Austria na ito ang huling opsyon ng Beermen na nangangapa sa team standings ng torneo kahit nakuha nila ang unang panalo kontra Rain or Shine, 104-91, noong Martes ng gabi.

“We’re talking about getting an Asian import dahil nga sa daming mga injuries sa team. It’s inevitable kasi kailangan namin. We need a player who is very talented like the other Asian imports of other teams. Lumalalim ang bench nila at iyan ang kailangan para makapasok sa playoffs,” wika ni Austria. “I already asked permission from management and they’re open to it. But I want to give exposure to my local players kasi yung mga Asian imports, yung ginagawa nila, kaya ring gawin ng mga locals. It’s a matter of mindset but it’s an option and I’m considering that.”

Nakuha ng SMB ang panalo dahil sa 36 puntos ni AZ Reid at 22 puntos naman mula kay June Mar Fajardo.

Inamin din ni Austria na malaking problema para sa Beermen ang kalusugan ng ilan nilang mga manlalaro.

(James Ty III)