SMB vs Kia

PAGHIHIGANTI at pagbangon buhat sa pagkakadapa ang pakay ng San Miguel Beer sa duwelo nila ng KIA Carnival sa PBA Governors Cup mamayang 7 pm sa Mall of Asia Arena sa Pasay City.

Magtatagpo naman ang NLEX at lumakas na Barako Bull sa unang laro sa ganap na 4:15 pm.

Matatandaang hiniya ng KIA ang San Miguel, 88-78 sa nakaraang Commissioner’s Cup. Kapwa hindi nakalampas sa elimination round ang Carnival at Beermen.

Ito ay nagsilbing matinding dagok sa Beermen dahil sa nagkampeon sila sa Philippine Cup.

Pinabalik ng San Miguel ang 6-5 na si Arizona Reid na naglaro rin para sa kanila sa Commissioner’s Cup kahit pa 6-5 lang ang sukat nito at puwedeng kumuha ang San Miguel ng import na may height na 6-8. Walang makakasamang Asian reinforcement si Reid.

Hindi na kumuha pa ng ikalawang import si coach Leo Austria dahil naniniwala siyang matatag na ang kanyang backcourt na pinamumunuan nina Alex Cabagnot at Chris Ross.

Aasa rin si Austria kina reigning Most Valuable Player June Mar Fajardo, Arwind Santos, Marcio Lassiter at Chris Lutz.

Hindi nakabalik sa poder ng KIA ang 7-4 na si PJ Ramos dahil sa commitment nito para sa Puerto Rico. Kaya kinuha na lang ng Carnival ang seven-footer na si Hamady Barro N’Diaye na nakapaglaro para sa Washington Wizards at Sacramento Kings sa NBA.

Kinuha rin ng KIA ang serbisyo ng Chinese Taipei star na si Jet Chang. Ang 26-taong gulang na si Chang ay proukto ng Birgham Young University-Hawaii. Inihatid niya ang koponang ito sa runner-up finish sa 2011 NCAA Division II tournament. Naglaro din siya para sa Chinese Taipei sa 2009 at 2011 FIBA Asia championships.

Ang NLEX, na natalo sa Meralco sa quarterfinals ng nakaraang Commissioner’s Cup, ay pamumunuan nina Rob Jones at Micheal Madaly.

Ang 6-5 na si Jones ay produkto ng Mary’s College of California. Naglaro siya sa Brujos de Guayama sa Puerto Rico. Bago iyon ay dumayo na rin siya sa Greece, Dominican Republic at Poland.

Sina Jones at Madaly ay tutulungan nina Paul Asi Taulava, Nino Canaleta, Mark Cardona at Enrico Villanueva.

Kinuha naman ng Barako Bull ang 7-2 na si Liam Paul McMorrow na huling naglaro para sa Iowa Energy sa NBA D-League. Hindi kumuha ng Asian reinforcements ang Barako Bull

Magugunitang matapos ang Commissioner’s Cup ay kinuha ng Barako Bull sina Dylan Ababou at James Forrester buhat sa Barangay Ginebra kapalit ng kanilang first round pick sa susunod na season.

(SABRINA PASCUA)