Baracael itatapon ng Ginebra?

PAGKATAPOS na i-trade si Joseph Yeo sa Barako Bull kapalit ni Sol Mercado, inaasahang magpapatuloy ang Barangay Ginebra San Miguel sa pag-trade ng mga manlalaro sa ilalim ng bagong head coach na si Frankie Lim.

Ayon sa source, susunod na itatapon ng Gin Kings ang forward na si Mac Baracael na tulad ni Yeo ay hindi kursunada ni Lim sa sistema niya sa koponan.

Binanggit din ng source na ililipat si Baracael sa San Miguel Beer o sa Purefoods ngunit kailangan ng isa pang koponan upang makumpleto ang trade dahil hindi puwedeng mag-trade ang mga sister teams tulad ng Ginebra, SMB at Purefoods.

Nais umano ni Lim na kunin si Marcio Lassiter ng Beermen at Jake Pascual ng Barako na dating manlalaro ng coach noong nasa San Beda College pa sila.

Sa rookie draft ay nais din ni Lim na piliin ang isa pang dating taga-San Beda na si Garvo Lanete.

Makakasama ni Mercado sa backcourt ng Ginebra sina Mark Caguioa, LA Tenorio, Jayjay Helterbrand, Emman Monfort, Josh Urbiztondo at ang Mongolian import na si Sanchir Tungala.

(James Ty III)