Alapag saludo sa dating koponan

TINANGHAL na kampeon ang koponang Talk N Text pagkatapos ng dalawang overtime kontra Rain or Shine sa finale ng PBA Commissioners Cup. (HENRY T. VARGAS)

PARA sa dating beteranong point guard ng Talk n Text na si Jimmy Alapag, wala nang sasarap pa sa pagkakampeon ng kanyang dating koponan kahit hindi na siya naglalaro.

Sa unang conference ni Alapag bilang team manager ng Tropang Texters, nagkampeon sila sa PBA Commissioner’s Cup pagkatapos na makalusot sila kontra Rain or Shine, 121-119, sa double overtime noong Miyerkoles ng gabi sa Smart Araneta Coliseum.

Matatandaan na nagretiro si Alapag sa paglalaro at ginawa siyang team manager ng TNT pagkatapos na matalo ang Texters sa semifinals ng Philippine Cup nang winalis sila ng San Miguel Beermen.

Naging bayani sa Game 7 si Ranidel de Ocampo na nagtala ng 34 puntos, kabilang ang walo niyang puntos sa ikalawang overtime upang makalayo ang TNT, 114-108.

(James Ty III)