HATAW! D'yaryo ng Bayan hatawtabloid.com
BAGAMA’T nasa kasagsagan sa paglalaro si Derrick Rose sa Chicago Bulls para sa NBA Playoffs, hindi niya pinalagpas ang pagkakataon na bigyan ng suporta ang kanyang idolong si Manny Pacquiao para sa magiging laban nito kay Floyd Mayweather Jr sa May 2 (May 3 sa Pilipinas) sa MGM Grand sa Las Vegas.
Kahapon ay balita sa PhilBoxing na sinulat ni Homer D. Sayson na nagbigay ng Bulls jersey si Rose na pirmado nito para ipadala sa Pambansang Kamao na tanda ng kanyang pagsuporta sa nalalapit niyang laban kay Mayweather.
“Send Manny my regards and best of luck to him,” bilin ni Rose.
Matatandaang naging magkaibigan sina Rose at Pacman nang bumisita ang una sa Pilipinas ilang taon na ang nakararaan.
Hindi man makararating ang 3-time All-Star at 2009 NBA Rookie of the Year na si Rose sa venue ng laban ni Pacquiao, tiniyak niya na manonood siya sa pay-per-view para saksihan ang makasaysayang laban.
Laking pasasalamat ni Pacquiao nang matanggap ang jersey na ipinarating niya sa PhilBoxing.com.
