Asawa ng mga manlalaro nag-away sa dugout

 

KAHIT sa labas ng court ay mainit pa rin ang sagupaan ng Talk n Text at Rain or Shine sa finals ng PBA Commissioner’s Cup.

Sa katapusan ng Game 5 noong Biyernes ng gabi ay nagkasagutan sa labas ng dugout ang dalawang maybahay ng mga manlalaro ng dalawang koponan dahil sa mainit na aksyon at sobrang pisikal na laro.

Nagsigawan ang maybahay ng power forward ng TNT na si Harvey Carey na si November Tan at ang misis ni Jireh Ibanes ng ROS na si Camille Dowling na isang dating miyembro ng Perlas Pilipinas women’s basketball team.

Ayon sa mga saksi, nainsulto umano si Gng. Carey sa mga sinasabi ni Dowling sa kanya habang nag-uusap ang huli at ang kanyang mister.

Sumugod ang ilang mga bodyguards ng Araneta Coliseum upang pigilin ang insidente.

Nagulat ang kakampi ni Ibanes na si Ryan Arana sa inasal ni Dowling.

“Ang alam ko, tahimik lang yun si Camille,” wika ni Arana.

Dahil sa nangyari ay inaasahang lalong magiging mainit ang Game 6 ng Tropang Texters at Elasto Painters mamayang hapon sa Big Dome. Isang panalo na lang ang kailangan ng TNT para tuluyang masungkit ang kampeonato.

(James Ty III)