Lineup ng Gilas ‘di muna ilalabas

PUMILI na ang bagong head coach ng Gilas Pilipinas na si Tab Baldwin ng 26 na manlalaro mula sa PBA para makasama sa national pool na maghahanda para sa FIBA Asia Championships ngayong taong ito sa Tsina.

Ang torneong ito ay magiging qualifier para sa 2016 Olympics sa Rio de Janeiro, Brazil .

Sinabi ni PBA Media Bureau Chief Willie Marcial noong Miyerkoles ng gabi na hindi muna ilalabas ng liga ang listahan ni Baldwin dahil magkikipaglong muna ang coach sa mga team owners tungkol sa plano niya sa national team.

Ilang sources ang nagsabi na halos sigurado na sa bagong Gilas sina June Mar Fajardo, Greg Slaughter, Paul Lee at Jayson Castro.

(James Ty III)

Sina Fajardo, Lee at Castro ay dating mga manlalaro ng Gilas noong panahon ni coach Chot Reyes samantalang si Slaughter ay naging miyembro ng RP team noong panahon naman ni Rajko Toroman.

“It’s in the PBA’s hands now, we’re just going through a few process, but the names are all done. I’ve submitted them to all of my superiors, it’s really in their hands now when they are going to release it,” naunang sinabi ni Baldwin sa sports website na www.spin.ph.