Dating kakampi ni Lebron lalaro sa Alaska

ni James Ty III

ISANG dating kakampi ni LeBron James noong siya’y nasa high school pa ang magiging import ng Alaska Milk sa PBA Governors’ Cup na magbubukas sa Mayo 5.

Kinumpirma ng head coach ng Aces na si Alex Compton na darating sa bansa si Romeo Travis na kagagaling lang mula sa isang liga sa Rusya.

“The Russian tournament just ended so he’ll (Romeo) be here by tomorrow night (noong Martes),” wika ni Compton.

Magkasama sina Travis at James sa St. Vincent-St. Mary high school na nagkampeon noong 2003 bago sumikat si James sa NBA para sa Cleveland Cavaliers.

Nag-average si Travis ng 11.5 puntos, 6.0 rebounds at 2.2 assists sa 24 na laro para sa Krasny Oktyabr.

Naglaro rin si Travis sa Israel.

“He’s also a dominant player and can fit in a system. That’s my evaluation of him,” ani Compton. “Looking at the league he has played in Europe, he has a variety of style of play, and he really knows how to play.”

Natalo ang Alaska kontra Purefoods sa quarterfinals ng PBA Commissioner’s Cup.