Liz Almoro at Victor Aliwalas, ikinasal na!

KINOMPIRMA ni Liz Almoro, dating asawa ni Willie Revillame na ikinasal na sila ni dating Kapuso actor Victor Aliwalas sa pamamagitan ng isang exclusive wedding na ginanap sa San Francisco, California kamakailan.

Dinaluhan ang exclusive wedding (na kung hindi kami nagkakamali ay ginanap noong Mayo 14) ng ina ni Liz at ng malalapit nilang kaibigan at kamag-anak.

Ang kompirmasyon ni Liz ukol sa kanilang kasal ay kasunod ng mga retratong ipinost niya sa Instagram gayundin sa mga natanggap naming postcard kasama ang pre-wedding engagement pictures mula sa Nice Print Photography.

Kung ating matatandaan, nagpakasal noon si Liz kay Revillame sa isang civil wedding, March 2005 na sinundan agad ng church wedding noong June 2005. Na-annul naman ang kanilang kasal noong taong 2008. Nagkaroon sila ng isang anak, si Juan Emmanuel na 11 taong gulang na.

Ayon sa balita, taong 2010 pa may relasyon sina Liz at Victor.                         (HNT)