HATAW! D'yaryo ng Bayan hatawtabloid.com
NGAYON pa lang ay gusto ko nang sabihin na ang mga Filipino ay magkakaroon ng bagong statesman sa katauhan ni Senator Antonio “Sonny” Trillanes IV.
Masasabi kong hindi lugi ang 14,127,722 Pinoy na bumoto sa kanya nitong nakaraang May 2013 elections dahil bilang MAMBABATAS ay ginagawa niya ang lahat para bantayan at proteksiyonan ang interes ng sambayanan.
Ilang beses na nating nasubukan si Senator Trillanes sa kanyang ‘katapatan sa bayan.’
Nakulong siya dahil sa pagsusulong ng mutiny laban sa katiwalian sa military.
Pero kahit nakakulong siya ay ibinoto pa rin siya ng sambayanan at nanalong senador.
Noong nakakulong siya, hindi lang siya nagmukmok at nagbilang ng ‘rehas’ sa kanyang kinasasadlakan kundi gumawa siya ng mga programa, panukalang batas at iba pang tungkuliln ng isang regular na mambabatas.
Si Trillanes ang naghain ng petisyon para makakuha ng temporary restraining order (TRO) para hindi magtagumpay ang ‘swapang’ na kompanya ng Meralco na magtaas ng power rate.
Bagamat 60 araw lamang ang nakuhang TRO ni Sen. Trillanes, masasabi nating malaking bagay ‘yan para sa mga consumer habang ang Malacañang ay nga-iisip (kuno) ng paraan kung paano sosolusyonan ang hindi umano mapipigilang pagtaas ng power rate.
Buong tapang din na tinuligsa ni Trillanes ang paglalaan ni Jinggoy ng kanyang P100 milyones na pork barrel sa lungsod kung saan mayor ang kanyang ama — ang Maynila.
Sabi nga ni Sen. Trillanes … “Pakapalan na lang ito …”
‘E mantakin n’yo naman, alam na alam ni Jinggoy na siya ay under fire dahil sa paglalaan nila ng malaking porsiyento ng kanilang pork barrel sa mga pekeng non-government organization (NGO) ni Janet Lim Napoles pero nakuha pa niyang magbigay ng P100M sa lungsod ng tatay niya?!
‘E pakapalan na nga naman ‘yan. Lalo pa’t ang kanyang erpat ay convicted plunderer.
Parang ayaw talaga ng DELICADEZA ng mga Estrada at Ejercito.
Mukhang hindi ‘delicacy’ sa kanilang pamilya ‘yan.
Mabuti na lamang at hindi ganyan ang ginagawa ni Sen. Trillanes at malayo niyang gawin ‘yan.
Mabuhay ka Senator Trillanes!
Nawa’y magpatuloy ka sa iyong magandang ginagawa at huwag kang magpasindak sa mga tiwaling sistema at gawa.
Suportado ka ng 14 milyong Filipino!
Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
