Marian, nagpaka-‘Diva’ at VIP (Kahit sa opening ng basketball…)

LUTANG na lutang  ang Kapuso Primetime Queen na si Marian Rivera sa pagbubukas ng Philippine Basketball Association Philippine Cup noong Linggo ng gabi sa Smart Araneta Coliseum. Si Marian ay muse ng Barangay Ginebra San Miguel dahil siya ang napiling calendar girl ng nasabing alak para sa susunod na taon.

Seksing-seksi si Marian sa kanyang pulang long gown at tinilian siya ng fans ng Ginebra na nanood sa Big Dome bago ang laro ng koponan kontra San Mig Coffee.

Ngunit sa gitna nito, talagang diva ang dating ni Marian dahil dumating siya sa Araneta ilang minuto bago nagsimula ang opening ceremonies.

At hindi lang iyan, inilagay si Marian sa VIP room mag-isa kasama  ang kanyang mga alalay sa backstage habang sa hiwalay na kuwarto ipinasok ang ibang muses tulad nina Isabel Oli, Maxene Magalona, at Lauren Young na parehong Kapuso stars din.

Umalis kaagad si Marian pagkatapos ng programa at hindi na niya pinanood ang game ng Ginebra, bukod sa pag-isnab sa mga interview ng mga media sa kanya.

Sa ipinakitang ugali ni Marian noong Linggo, talagang malaki ang ipinagbago niya mula noong siya’y huling naging muse ng Talk n’ Text noong 2007 PBA opening.

Noong panahong iyon ay hindi siya maarte at kasundo niya ang  players, fans at kasamang muses.

Ngayon, sa lahat ng mga nangyari sa kanyang career, talagang masasabi natin na iba na ang mundong tinatakbo ngayon ni Marian.

James Ty III