Cristine, nag-iiba na ng image

HINDI pa man halos nakahihinga ang mga nakapanood  sa pagtatapos ng Bukas Na lang Kita Mamahalin noong Biyernes ay heto at muli na namang mapapanood si Cristine Reyes bukas sa pambatang seryeng Honesto bilang leading lady ni Paulo Avelino.

Nag-iiba na ang imahe ngayon ni Cristine simula ng gawin niya ang Bukas Na Lang Kita Mamahalin dahil maganda ang papel niya bilang babaeng nagmamahal sa iisang lalaki maski na may iba siyang pinakasalan dahil sa pangyayaring hindi maiwasan.

Sa Honesto ay good girl din daw si AA (tawag kay Cristine) bagay na tinanong ang aktres kung hindi ba challenge sa kanya ang role.

“Actually, hindi po pressured (role) kasi good girl naman talaga ako kaso nga lang, minsan may moments na ano (topak), ‘yun lang naalanganin, kung mayroon something.

“I try my best na maging good girl naman po but hindi ko naman idine-deny na may pagka-bad girl din naman ako. Yes, para po sa inyo, magpapaka-good girl po ako para sa show na ito at sa ABS-CBN, ayoko po silang i-fail,” nakangiting sabi ng aktres.

Sinegundahan naman ng creative head ng Dreamscape unit na si Rondell Lindayag na good girl si Cristine at hindi totoong bad girl siya dahil ni minsan daw ay hindi siya naging sakit ng ulo sa mga project nito sa Dreamscape tulad ng Dahil sa Pag-Ibig at Bukas Na Lang Kita Mamahalin.

At dahil pareho silang single ngayon ni Paulo ay possible raw bang maging sila?

“’Yung kay Paulo naman, it doesn’t mean naman kapag partner mo ang isang lalaki at single siya, eh, magiging kayo. As much as possible po, sana hindi kasi ‘di ba, ano, every project, boyfriend mo ‘yung guy parang hindi naman okay,” pangangatwiran ulit ng dalaga.

Reggee Bonoan