Dawn, angat na angat ang galing!

HINDI na talaga matatawaran ang galing ng isang Dawn Zulueta. Sa tuwina’y laging lumulutang ang kanyang galing sa mga teleseryeng kanyang nilalabasan sa ABS-CBN2. Ang husay niya’y ‘di malilimutan tulad ng naging pagganap niya sa Walang Hanggan.

Pagdating naman sa Bukas Na Lang Kita Mamahalin na pinagbibidahan din nina Gerald Anderson, Cristine Reyes, Rayver Cruz, at Dina Bonnevie, hindi rin puwedeng hindi mapansin ang galing ni Dawn.

Dito sa BNLKM, kakaibang Dawn ang nakikita namin. Dahil na rin siguro sa kaibahan ng role niya bilang si Zenaida. Ginagampanan niya ang isang submissive at loving mom ni Migue (Gerald).

Sa Walang Hanggan, siya naman si Emily (Coco Martin’s mom), isang mabait na ina pero later on ay naging palaban. Sa BNLKM, iniba ni Dawn ang  atake sa kanyang role.

Nakatitiyak akong hindi lang ang mga inang tulad ni Dawn ang nadadala sa mga drama scene niya lalo na noong hinuli at nasentensiyahan na si Gerald. Ramdam na ramdam mo ang bigat sa dibdib ng eksenang iyon.

Masasabi naming, kahit ilang beses mong gawin ang isang role, pero kung alam mong gawin ang trabaho bilang aktres, hindi ka pagsasawaan ng tao. ‘Yun ang kaibahan ni Dawn bilang aktres. Mabuhay si Dawn dahil hanggang ngayon ay napapagtagumpayan niya ang pagiging aktres.
Maricris Valdez Nicasio