Blue Eagles umibabaw sa Tamaraws

GINILITAN ng Ateneo Blue Eagles ang defending champion Far Eastern University Tamaraws, 1-0 nung isang araw  sa UAAP men’s football tournament sa McKinley Hill Stadium.

Dumagit ng puntos si rookie Jarvey Gayoso sa 80th minute para palakasin ang tsansa ng Ateneo na dumapo sa Final Four.

Nagkaroon ng pagkakamali ang Tamaraws keeper na si Ray Joyel at hindi ito pinalampas ni Gayoso para masungkit ang full three points para sa Blue Eagles.

Lumanding ang Blue Eagles sa fourth place kapit ang 21 points, inungusan ang University of Santo Tomas na nauwi sa 1-1 draw sa laban nila kontra Adamson University noong Sabado.

Pangalawang sunod na match na hindi naka-goal ang FEU.

Scoreless draw sa 0-0 ang laban ng FEU sa National University Bulldogs noong Huwebes.

Napigil sa 24 points ang Tamaraws na galing sa six-game winning streak bago nagkumahog sa dalawang huling laro, pero hawak pa rin nila ang liderato.

Samantala, tinuhog ng De La Salle Green Archers ang University of the East, 2-0, para masolo ang third spot tangan ang 23 points.

Mag-isa sa pangalawang puwesto ang UP habang laglag sa No. 5 ang Growling Tigers bitbit ang 19 points.

Sa women’s football, nauwi sa goalless draw ang laban ng FEU sa UST.

Nanatili ang Lady Tamaraws sa third spot na may eight points, isang puntos na abante sa No. 4 na Tigresses. ( ARABELA PRINCESS DAWA )