Ama tepok, 8-anyos anak sugatan (Pedicab sinalpok ng multicab)

PATAY ang isang ama at malubha ang 8-anyos niyang anak na batang babae makaraan salpukin ang sinasakyan nilang pedicab ng isang multicab kamakalawa ng gabi sa Pasay City.

Kinilala ang biktimang si Piolito Aloccilja, 36, nakatira sa #2142-14 Adriatico St., Malate, Maynila, nalagutan ng hininga habang ginagamot sa Pasay City General Hospital (PCGH) dahil sa matinding pinsala sa katawan.

Ang anak niyang si Princess Barientos, residente rin ng naturang lugar, ay nilalapatan ng lunas sa nabanggit na pagamutan.

Habang nasa kustodiya na ng pulisya ang suspek na si Gilbert Reyes, 40, ng San Jose del Monte, Bulacan, nahaharap sa kasong reckless imprudence resulting in homicide and frustrated homicide.

Sa pagsisiyasat ni PO3 Mark Jun Dialde Anaviso, ng Pasay City Traffic Bureau, naganap ang insidente 10:30 p.m. sa Southbound lane ng Macapagal Avenue ng naturang lungsod.

Sakay ang mag-amang biktima ng isang pedicab at habang binabagtas ang naturang lugar ay biglang sumulpot ang isang Mitsubishi FB Body (multicab) na may plakang TXL0985, na minanameho ni Reyes.

Huli na bago nakontrol ni Reyes ang preno ng sasakyang kanyang minamaneho, dahilan upang masalpok nito pedicab ng mga biktima.