Vina at Denise, nakare-relate sa Nasaan Ka Nang Kailangan Kita

ni Pilar Mateo

THE once single girls…now moms!

Aminado ang Kapamilya actresses na sina Vina Morales at Denise Laurel na nakare-relate sila sa mga karakter nila pagdating sa pag-ibig sa afternoon drama series sa ABS-CBN na Nasaan Ka Nang Kailangan Kita.

“Nakaka-relate talaga ako sa buhay ni Cecilia kasi parehas kami na tumatayong matatag bilang isang single mom para sa anak namin. Tulad niya, naging mas matibay din ako bilang isang tao, lalo na bilang isang ina, nang dahil sa mga karanasan ko sa pag-ibig,” sabi ni Vina kaugnay ng kanyang karakter sa isa sa pinakabagong teleserye sa Kapamilya Gold.

Para kay Denise, pareho sila ng kanyang ginagampanang si Toni pagdating sa pagpapakita ng pagmamahal. Aniya, “Para sa akin nagkakaparehas kami ni Toni kung paano umibig, parehas kami na handang isakripisyo at gawin ang lahat para sa mga taong mahal namin.”

Tiyak na mas magiging kaabang-abang para sa TV viewers ang kuwento ng Nasaan Ka Nang Kailangan Kita sa nalalapit na paglabas ngayong linggo ng mga karakter nina Jane Oineza, Jerome Ponce, Joshua Garcia, at Loisa Andalio bilang sina Corinne, Ryan, Joel, at Bea kaya huwag palampasin ang pinakabagong teleserye na sasalamin sa iba’t ibang klase ng pag-ibig, na matutunghayan araw-araw, tuwing 3:15 ng hapon sa Kapamilya Gold.