Kontrata sa Kapamilya ni Robin, ‘di pa pinipirmahan

ni  Reggee Bonoan

PARANG mag gusto na lang ni Robin Padilla na manatili sa bahay nila ng asawang si Mariel Rodriguez dahil enjoy siya sa mga inihahandang organic food and juices.

Kuwento ng manager ni Robin na si Betchay Vidanes, hindi pa pinipirmahan ng aktor ang renewal contract nito sa ABS-CBN. “Gusto munang magpahinga ng lolo mo, masyado sigurong napagod noong nakaraang taon,” kuwento sa amin ni Betchay.

Parehong walang trabaho sina Robin at Mariel, paano ang pang-araw-araw nilang gastusin? Katwiran ni Betchay sa amin, “Eh, siguro nakaipon naman kasi hindi naman maglalakas loob na magbakasyon kung walang naitabi kasi marami rin siyang gastusin.

“At saka busy si Robin sa pelikulang ‘Bonifacio’, rito muna siya nagko-concentrate kaya ayaw muna niya ng TVshow.”

Oo nga, baka malaki ang naipon ni Binoe dahil paano niya mapagkakasya ang buwanang allowance ng mga anak, nagpagawa pa ng bahay para sa mga kapatid na Muslim at ang maintenance ng bahay sa Fairview, ang allowance na ibinibigay din niya kay Mommy Eva Carino, ilang kapatid na umaasa at ang gastusin din nila ni Mariel sa araw-araw?

Buti na lang daw at may mga nagre-renew pang product endorsement ang alaga niya. As of now ay ang pelikulang Bonifacio ang pinagkaka-abalahan ni Binoe na independent produce ng mga kaibigan niya. At dahil walang TV show si Robin ay si Jasmine Curtis Smith ang tinututukan ngayon ni Betchay na abot-abot naman ang pasalamat din sa kanya ng SPINNation host dahil marami siyang projects sa TV5 at endorsements.

“Kaya nga, sana hindi muna siya magseryoso sa lovelife kasi sayang ang opportunity, malayo pa ang mararating niya,” katwiran sa amin ng nasabing manager.