HATAW! D'yaryo ng Bayan hatawtabloid.com
Kabuuang 42 law offenders ang magkakasunod na naaresto ng Bulacan police sa sunod-sunod na operasyon laban sa krimen sa lalawigan hanggang kahapon ng umaga, Hulyo 21.
Batay sa ulat kay PColonel Relly B. Arnedo, provincial director ng Bulacan PPO, isinasaad na 20 drug peddlers ang arestado matapos ang mga serye ng anti-illegal drugs operations na ikinasa ng mga operatiba ng Station Drug Enforcement Units (SDEU) ng Malolos, San Jose Del Monte, Meycauayan, San Rafael, San Miguel, Pandi, Pulilan, Guiguinto, Calumpit, at Norzagaray C/MPS.
Nakumpiska sa mga suspek ang kabuuang 63 pakete ng shabu, drug paraphernalia, at buy-bust money na ginamit sa operasyon.
Samantalang walo namang katao na wanted sa batas ang arestado sa iba’t-ibang manhunt police operations na isinagawa ng tracker teams ng Meycauayan, San Jose Del Monte, Santa Maria, Calumpit, at Angat C/MPS.
Ang mga arestadong suspek at akusado ay kasalukuyang nasa kustodiya ng kani-kanilang arresting police station para sa nararapat na disposisyon.
Sa inilatag namang anti-illegal gambling operations ng mga operatiba ng San Jose Del Monte, Meycauayan, Baliwag, at San Rafael C/MPS ay nagresulta sa pagkaaresto ng 14 na indibiduwal na naaktuhan sa pagsusugal.
Nakumpiska sa mga arestadong suspek ang isang mahjong set, isang set ng playing cards, dalawang pad booklet ng papelito na may nakasulat na mga taya sa sugal, tatlong one-peso coin used na gamit sa cara y cruz (pangara), at bet money sa iba’t-ibang denominasyon. (MICKA BAUTISTA)
