HATAW! D'yaryo ng Bayan hatawtabloid.com
MATABIL
ni John Fontanilla
MASALIMUOT ang naging journey ng career ng isa sa Tiktok Superstar na si Berni Batin bago niya narating ang kasikatan sa online world na tinatamasa ngayon.
Iiba’t ibang trabaho ang pinasok niya para kumita para sa kanya at sa kanyang pamilya.
At nang magpandemic ay at saka siya nagdesisyong gumawa ng content sa Tiktok bilang supladang tindera sa sari-sari store na nag-click at nagpabago ng kanyang buhay.
Ngayon nga ay susubukan naman nito ang mainstream at ang Unkabogable na si Vice Ganda ang inspirasyon ni Berni para maging mahusay na host/ comedian.
“Ang sobrang idol ko po talaga sa pag-arte at pagho-host ay si Vice Ganda.
“Kasi simula ko po siya nakita, sobrang talino niya, sobrang bilis mag-isip talagang all in package siya, marunong kumanta, marunong sumayaw, marunong umarte, marunong magpatawa, so, parang nasa kanya ng lahat.
“Dream ko nga po na makasama si Vice Ganda sa shows o pelikula.
“Sana ay patuloy pa rin akong samahan ng aking mga follower, ang supporters kung saan man ako mapunta, pero ngayon po gusto ko pong magkaroon ng show like teleserye o pelikula.
“Simula pa kasi noon gusto ko na talaga maging artista, kaya naman sobrang saya ko kasi natutupad na unti-unti ang pangarap ko.”
At isa nga sa aabangan ngayong taon kay Berni ay ang paglabas ng kanyang kauna-unahang kanta entitled Utang Mo composed by Joven Tan under Star Music.
“Ngayon po ang aabangan sa akin, eto po ‘yung launching ng aking kanta na pinamagatang ‘Utang Mo’ na mula sa komposisyon ni Joven Tan under Star Music.
“Nakatutuwa nga po kasi pinagkatiwalaan ako ng Star Music na magkaroon ng kanta, kaya nagpapasalamat ako sa kanila,”pagtatapos ni Berni.
