NOTAM inalis na sa Zambo airports (2 commercial flights unang lilipad)

INIHAYAG ng Civil Aviation Authority of the Philippines (CAAP) kahapon ang pag-alis sa Notice to Airman (No-tam) na ipinalabas hanggang Setyembre 21, 2013 bunsod ng pagbuti ng sitwasyon sa Zamboanga International Airport.

Pansamantala dalawang commercial flights lamang muna ang pinayagan ng CAAP na makalipad ngayong Huwebes, ito ay ang PAL Express at Cebu Pacific Air, ayon kay CAAP Deputy Director General John Andrews.

Limitado rin sa isang bagahe ang maaaring madala ng bawa’t pasahero, aniya, sasama siya mismo sa naturang flight upang matiyak na masusunod ang kautusan ng ahensya.

Aniya, wala nang nagbabantang panganib sa Zamboanga airport dahil kontrolado ito ng pamahalaan, at nakita nila ito nang mismong magsagawa sila ng assessment sa naturang lugar.

Patuloy rin na magsasagawa ng assessment ang CAAP sa Zamboanga City upang tiyakin na maaaring pahintulutan sa Biyernes ang paglipad ng apat pang flights.

Sa kabila nito, patuloy na hindi pinapayagan ang night operation ng commercial flights sa Zamboanga airport dahil sa umiiral na curfew sa naturang siyudad.

Ayon sa CAAP, umabot na sa halos 7,000 pasahero ang naapektohan sa mahigit isang linggong pagsasara ng Zamboanga International Airport dahil sa kaguluhan.

Napag-alaman na mahigit 5,000 pasahero mula sa Cebu Pacific ang apektado habang 1,200 naman sa PAL Express.

ni GLORIA GALUNO