HATAW! D'yaryo ng Bayan hatawtabloid.com
MATABIL
ni John Fontanilla
HINDI raw muna tatanggap ng teleserye ang awardwinning actress na si Sylvia Sanchez dahil mas magpo-focus muna ito sa pagpo-prodyus ng pelikula sa kanyang bagong tatag na film productions, ang Nathan Studios.
Ayon kay Sylvia, “Hindi muna ako tatanggap ng teleserye, susubukan ko muna ang pagpo-prodyus ng pelikula.”
Kamakailan nga ay lumipad ito kasama ang kanyang pamilya patungong France para dumalo sa MIPCOM Cannes 2022 o ang 38th International Coproduction and Entertainment Centent Market, hindi lamang bilang suporta sa kanyang anak na si Quezon City District 1 Congressman at mahusay na actor at bida sa Cattleya Killer na si Arjo Atayde, kundi bilang co-producer ng psychological thriller series.
Sinabi pa ni Sylvia na ayaw niyang maging artista lamang sa buong buhay niya, kaya naman susubukan niya ang paggawa ng pelikula para na rin makatulong sa ibang artistang walang trabaho at sa mga tao sa likod ng kamera.
“Hindi naman puwede na buong buhay ko artista ka. May mga bagay din na gusto kong gawin, like pagpro-prodyus ng pelikula para tulong ko na rin at dagdag trabaho sa mga kapwa ko artista at sa mga tao sa likod ng kamera.”
Ilan sa mga proyekto ng Nathan Studios ay ang mga pelikulang X Factor, Topakk, at Cattleya Killer.
