Convenience store nilooban
KAWATAN TIGOK SA ENKUWENTRO KASABWAT NAKATAKAS

NAPATAY ang isang hindi kilalang suspek sa panloloob sa isang convenience store matapos makipagbarilan sa mga awtoridad habang nakatakas ang kanyang kasabwat sa bayan ng Baliwag, lalawigan ng Bulacan, nitong Linggo ng madaling araw, 9 Oktubre.

Sa ulat mula kay P/Col. Relly Arnedo, OIC ng Bulacan PPO, dakong 1:52 am kahapon nang mmagresponde ang mga tauhan ng Baliwag MPS matapos makatanggap ng ulat na may hinoldap na convenience store sa Brgy. Sulivan, sa nabanggit na bayan.

Nabatid na nakatangay ang mga suspek ng hindi pa matiyak na halaga ng cash saka tumakas sakay ng motorsiklo at iniwan ang mga hindi sinaktang biktima.

Sa isinagawang pursuit operation ng mga awtoridad, namataan nila ang dalawang taong sakay ng motorsiklo na tumutugma sa pagsasalarawan sa mga suspek na ibinigay ng mga biktima.

Pinara ng mga operatiba ang mga suspek ngunit imbes huminto ay pinaharurot ang kanilang motorsiklo sanhi ng mahabang habulan.

Nang masukol, bumunot ng baril ang isa sa mga suspek at pinaputukan ang mga pulis na napilitang gumanti na nagresulta sa kanyang kamatayan. Nakatakas ang kasabwat ng napaslang.

Narekober ng pulisya sa pinangyarihan ng krimen ang apat na basyo ng bala ng kalibre .45; isang Armscor na kalibre .45 na may isang magasin, limang cartridges; at isang belt bag na naglalaman ng cash na halagang P4,240. (MICKA BAUTISTA)