2 miyembro ng akyat-bahay gang nasakote

WALANG KAWALA ang dalawang hinihinalang miyembro ng akyat-bahay gang nang masukol at maaresto sa isinagawang operasyon ng pulisya sa lungsod ng Malolos, lalawigan ng Bulacan, nitong Miyerkoles, 6 Hulyo.

Sa ulat na ipinadala kay P/Col. Charlie Cabradilla, acting provincial director ng Bulacan PPO, napag-alamang dakong 1:00 am nang nakatanggap ng tawag ang Malolos CPS sa naganap na nakawan na kagagawan ng notoryus na grupong akyat-bahay sa isang subdibisyon sa Brgy. Sumapang Matanda, sa nabanggit na lungsod.

Bilang tugon, agad ikinasa ng mga operatiba ang isang hot pursuit operation para sa pagtunton at pagdakip sa mga suspek na sinasabing hindi pa nakalalayo sa lugar.

Katuwang ang mga opisyal at mga tanod ng Brgy. Bangkal, nadakip ang mga suspek na sina Julius Ryan Lobordio, 23 anyos, residente ng Brgy. Bangkal, Malolos; at Julius Ryan Ignacio, 20 anyos, residente ng Brgy. Sta. Clara, Guiguinto.

Sa isinagawang follow-up operation, narekober ang mga gamit ng mga biktima na tinangay ng mga suspek na sinampahan na ng kaukulang kaso sa hukuman. (MICKA BAUTISTA)