2 kelot timbog sa P3-M shabu

MAHIGIT sa P3 milyong halaga ng hinihinalang shabu ang nakuha ng mga awtoridad nang mahuli ang dalawang lalaking sinabing nagbebenta ng droga sa magkahiwalay na buy bust operation sa Taguig at Parañaque City.

Sa ulat na natanggap ni P/BGen. Jimili Macaraeg, director ng Southern Police District (SPD), kinilala ang suspek na si Alonto Aminola Kasim, alyas Alonto,  27 anyos.

Bandang 6:30 pm nang mahuli  ang suspek ng mga tauhan ng Taguig City Police sa Road 14 Maguindanao St.,  Barangay New Lower Bicutan, ng nabanggit na lungsod.

Bunsod ng ikinasang buy-bust operation laban sa suspek, matapos makatanggap ng tip ang mga pulis hinggil sa ilegal na gawain habang ang isa sa mga operatiba ay nagpanggap na bibili ng droga.

Tinatayang nasa 500 gramo ng shabu, nagkakahalaga ng P3,400,000 ang nakompiska sa suspek.

Dakong 3:30 am nang madakip ang isa pang suspek na si Edrian Geronimo Chacon, 30 anyos, isa pang buy-bust operation ang ikinasa ng Parañaque City Police sa Angelina Canaynay Avenue, Barangay. San Isidro, Parañaque City.

Nasa 70 gramo ng shabu ang nakompiska mula sa suspek na may Standard Drug Price na P476,000.00.

Dinala ang illegal drugs na nasamsam ng mga awtoridad sa SPD Forensic Unit.

“I would like to commend our operating units for another laudable accomplishment that resulted in the confiscation of large amount of illegal drugs. We will remain aggressive in our fight against illegal drugs and other forms of criminality in southern metropolis,” pahayag ni P/BGen. Macaraeg. (GINA GARCIA)