3 medical experts mula Israel dumalaw sa Parañaque

BINISITA ng tatlong medical experts mula sa Israel ang Solaire vaccination hub sa lungsod ng Parañaque.

Ang tatlong medical experts ay kinilalang sina Dr. Avraham Ben Zaken, Dr. Adam Nicholas Segal, at Dr. Dafna Segol.

Kasama ng medical experts sina vaccine czar Sec. Carlito Galvez, Jr., Testing Czar Sec. Vince Dizon, Sec. Harry Roque at Parañaque City Mayor Edwin Olivarez.

Ayon kay vaccine czar Sec. Galvez, Jr., tatlong eksperto mula sa Ministry of Health ng Israel ay dumalaw sa bansa upang tumulong na paigtingin ang paraan ng pagbabakuna laban sa CoVid-19.

Sa limang araw na pagbisita, tatalakayin ng Israeli medical expert at Inter Agency Task Force (IATF) ang mga strategy sa vaccine deployment, paglipat sa new normal, at pagtugon sa mga nag-aalinlangang magpabakuna.

Target ng pamahalaan na gayahin ang mga paraan ng Israel upang mahikayat ang mamamayan na magpabakuna, tulad ng pagbibigay ng incentives sa mga nagpabakuna at restrictions sa hindi pa nababakunahan.

Nakatakdang magpa-press conference ang tatlong medical experts sa Lakeshore vaccination hub sa Taguig City ngayong araw. (JAJA GARCIA)