14-anyos pababa bawal sa malls (Bagets asymptomatic carriers ng virus)

KINATIGAN ng Palasyo ang pasya ng 17 alkalde sa 16 siyudad at isang munisipalidad sa Metro Manila na ipagbawal pa rin ang pagpunta ng mga menor de edad sa mga shopping mall ngayong Kapaskuhan.

Sinabi ni Presidential Spokesman Harry Roque, nasa guidelines ng Inter-Agency Task Force na kapag ang isang lugar ay nasa modified enhanced community quarantine at modified general community quarantine, tanging ang mga nag-eedad 15 hanggang 21 anyos ang maaaring lumabas.

Pero depende pa rin aniya ito sa pagpapasya ng local government units (LGUs).

“Well, ang guidelines naman po talaga ng ating IATF ay kapag naka — from MECQ to MGCQ, from 21 years old to 15 puwedeng lumabas pero discretion po ng local government units kung ano iyong edad na palalabasin,” pahayag ni Roque.

Una rito, sinabi ni Metro Manila Development Authority (MMDA) general manager Jojo Garcia na konsultahin muna ng Metro Manila Council ang mga eksperto pero hindi pumabor ang Philippine Pediatric Society, Inc., at Pediatric Infectious Disease Society of the Philippines, na payagan ang mga bata na makapasyal sa mga mall.

Bawal ang 14 anyos pababa na mamasyal sa mga shopping mall.

Base aniya sa pananaw ng mga eksperto, karaniwang asymptomatic carriers ng virus ang mga bata. (ROSE NOVENARIO)