HATAW! D'yaryo ng Bayan hatawtabloid.com
LABING-APAT pang Pinoy seafarers na nasa Brazil, ang nagpositibo sa COVID-19, ayon kay Brazil Philippine Ambassador Marichu Mauro.
Sa report, sinabing nasa 11 seafarer ang naka-recover, 2 ang nananatili sa ospital at isa ang pumanaw.
“Mayroon tayong Filipno seafarers, hindi po sila nakatira rito sa Brazil ngunit dumaong ang ship sa Brazilian ports, mayroon po tayong mga 14 Filipino seafarers who were found out to be COVID positive,” ani Mauro.
Sinabi ng naturang opisyal, bagama’t marami ang kaso ng COVID-19 sa Brazil, kakaunti lang ang mga naitalang kaso para sa mga Pinoy.
Wala aniyang tinamaan ng virus sa mga Pinoy na nakatira at nagtatrabaho mismo sa Brazil.
Aniya, patuloy ang monitoring sa sitwasyon ng mga OFWs sa Brazil sa pamamagitan ng kanilang honorary consuls.
Aniya, bukas ang kanilang mga tanggapan para sa mga hinaing o paghingi ng tulong sa hanay ng mga Filipino doon lalo sa ilan na nawalan ng trabaho dahil sa pagsasara ng mga restaurant, hotels at iba pang negosyo sa Brazil dulot ng pandemya.
Ilang Pinoy aniya ang nagpahiwatig na gusto nang umuwi ng Filipinas, kung kaya’t nakikipag-ugnayan na ang Embahada sa Department of Foreign Affairs (DFA) para matulungan sila.
Pinaalalahanan ang mga Pinoy sa naturang bansa, na iwasan muna ang pagbiyahe para hidi mahawaan ng virus. (JAJA GARCIA)
