Mega web of corruption: Lupain ng IBC-13, ‘inagaw’ (Ika-10 Bahagi)

ni ROSE NOVENARIO

PANGKARANIWANG kalakaran sa lipunang Filipino na ang pribadong lupain ay nakakamkam o naipagbibili sa paluging presyo para sa pagsusulong ng proyekto ng pamahalaan.

Kabaligtaran ang naging kapalaran ng mahigit apat na ektaryang lupain na pagmamay-ari ng Intercontinental Broadcasting Corportaion (IBC-13), isang sequestered, government-owned and controlled corporation (GOCC) at state-run network.

Sa isang kuwestiyonableng joint venture agreement na pinasok ng IBC-13 sa R-II Builders/Primestate Ventures, Inc., noong Marso 2010, naglahong parang bula ang pangalan ng state-run network bilang may-ari ng ekta-ektrayang lupain matapos ang anim na taon.

Maging ang Commission on Audit (COA) ay namangha sa kinalabasan ng JVA, kaya’t sa 2018 Annual Audit report nito’y sinabi na ang terms and conditions ng inamyendang JVA noong 2016 ay nagresulta sa contract of sale imbes joint venture agreement.

Ang orihinal na probisyon ng JVA ay i-develop ng RII Builders-Primestate Ventures, Inc., ang 36,401 square meters mula sa 41,401 sqm na pag-aari ng IBC-13 sa Broadcast City, Capitol Hills, Quezon City para sa proyektong residential complex na LaRossa at ang natitirang 5,000 sqm ay tatayuan umano ng dalawang building para sa state-run network.

Ngunit sa amended JVA , matapos ang siyam na taon na pagbabayad ng P728-M ng R-II Builders/Primestate Ventures sa sistemang installment o hulugan sa IBC-13 ay itinuring itong kabayaran para sa 36,301 square meters na lupain imbes “sharing of net revenues in a residential development.”

Batay sa COA report, nalugi ang IBC-13 sa naturang transaksiyon dahil kung ang talagang intensiyon nito’y ibenta ang ari-ariang lupain, dapat ay cash basis at kung hulugan, sana’y may ipinataw na interes sa halagang idineklara.

“IBC-13 was at a disadvantage for the reason that with the intention to sell the property, the payment should have been made outright or at the very least interest should have accrued on the deferred payments.”

Anang COA, ang naturang transaksiyon na itinuturing na pagbebenta ng ari-arian ng gobyerno, ay paglabag sa Section 79 ng PD No. 1445 at Sections 2 at 3 ng EO No. 888, o “authority to dispose unserviceable equipment and disposable property.”

Sabi ng COA, ang bentahan ay hindi dumaan sa bidding, kaya’t maaaring hindi natanggap ng gobyerno ang tamang bayad base sa tunay na halaga ng lupain ng IBC-13 na napunta sa R-II Builders/Primestate Ventures.

Ang R-II Builders ay pagmamay-ari ng negosyanteng si Reghis Romero. (MAY KASUNOD)