HATAW! D'yaryo ng Bayan hatawtabloid.com
NAGING emosyonal si Imelda Papin sa presscon ng kanyang 45th anniversary concert sa October 26 sa Philippine Arena, ang Imelda Papin Queen @ 45.
Sinariwa kasi ni Imelda ang mga panlalait sa kanya nang nagsisimula pa lamang siya. Aniya, sinabihan siya na ang mga tulad niyang probinsiyana ay hindi sisikat. Pero she proved them wrong dahil naging superstar nga siya sa Bangkok Thailand na binansagang Asia’s Sentimental Songstress. At nang bumalik siya sa Pilipinas agad siyang tinangkilik bilang new singing sensation. At nagkasunod-sunod na ang kanyang tagumpay sa larangan ng pagkanta.
Hanggang ngayon, paborito pa ring kinakanta ang mga awitin niya. Katunayan, nai-revive pa nga ang isa niyang awitin, ang Isang Linggong Pag-ibig ng isang millennial singer, si LA Santos na nilapatan ng bagong tunog.
Kasama si LA sa mga special guest ni Imelda sa kanyang concert gayundin ang mga kaibigang sina Claire Dela Fuente, Eva Eugenio, Marco Sison, Pilita Corrales, Sonny Parsons, at Victor Wood.
Magbibigay din ng entertainment sina Andrew E., April Boy Regino, Darius Razon, Jovit Baldivino. Kasama rin ang kanyang anak na si Maria France (Maffi) with her three kids Keif, Zach and Xavier, mga kapatid na sina Gloria at Aileen, at Garry Cruz.
At sa mga kumukuwestiyon kung mapupuno ba ni Imelda ang Philippine Arena, ito ang sagot niya. “As of press time, 80% na ang tiket na nabibili.” Na ang ibig sabihin, kakaunti na lamang ang natitirang tiket.
Isang patunay na mainit pa rin hanggang ngayon si Imelda at marami pa rin ang gustong marinig ang maganda niyang tinig.
Ang Imelda Papin Queen @ 45 ay prodyus ng DreamWings Production & Papin Entertainment Productions. Para sa ticket, mag-log on sa smtickets.com o magtungo sa SM Box Office Ticket Booth. Ang kikitain ng konsiyerto ay ibibigay sa humanitarian projects ng IAP Foundation.
SHOWBIZ KONEK
ni Maricris Valdez Nicasio
